विवाह समारोहमा ग्यास पड्किएर आगलागि, १४ जनाको ज्यान गयो

१८ माघ, एजेन्सी। भारत झारखण्डको धनबाद सहरमा बुधबार साँझ एउटा बहुतले भवनमा आगलागी हुँदा १४ जनाको मृत्यु भएको छ ।

विवाह समारोहमा ग्यास सिलिण्डर पड्किएर यो घटना भएको हो । एक हप्तामा धनबादमा आगलागीको यो दोस्रो घटना हो । सहरको व्यस्ततम इलाका बैंक मोड प्रहरी चौकी इलाकामा रहेको शक्ति मन्दिर नजिकै रहेको १३ तले आशिर्वाद टावर अपार्टमेन्टको दोस्रो तल्लामा आगलागी भएको थियो । जसले केही बेरमै ठूलो रुप लिएको थियो ।

खबर प्राप्त हुनासाथ दमकल घटनास्थलमा पुगेको थियो । कलेक्टर सन्दीप कुमारले ८ देखि १० जनालाई उद्दार गरिएको जानकारी दिए, जसको अवस्था गम्भीर रहेकोमा केहीको मृत्यु भएको छ ।

गत हप्ता शुक्रबार पनि धनबादको एक निजी नर्सिङ होममा आगलागी हुँदा दुई डाक्टरसहित कम्तीमा पाँच जनाको मृत्यु भएको थियो।