२९ भदौ, काठमाडौं। नेपाल चिकित्सक संघका अध्यक्ष डाक्टर अनिलविक्रम कार्कीले हेटौंडाका चिकित्सकमाथि आक्रमण गर्ने सबैलाई कारबाही नगरे भोलिदेखि देशभरिका अस्पतालमा आकस्मिकबाहेकका सबै सेवा बन्द गर्ने चेतावनी दिएका छन् ।
हेटौँडास्थित सञ्चो अस्पतालका डा.विकास थापा र डा. प्रशान्त विडारीमाथि आक्रमण भएको भन्दै दोषीलाई कारबाहीको माग गरेर चिकित्सकहरु आन्दोलनमा उत्रिएका हुन्।
संघले माग पूरा नभएमा आकस्मिक बाहेकका सबै सेवा ठप्प पार्ने चेतावनी दिएको छ । बिरामीको उपचारमा लापरवाही भएको भन्दै मृतकका आफन्तले डाक्टरलाई ज्यानै मार्ने उद्देश्यका साथ कुटपिट गरेको संघको आरोप छ ।
अस्पतालमा कार्यरत डा. थापा र बिडारीमाथि बुधबार बिहान कुटपिट भएको हो । कुटपिटमा संलग्न मृतककी पत्नी रमा प्रधान, छोरी रमिता प्रधान, छोरा रोहित प्रधान र भतिजा अनुप प्रधानलाई प्रहरीले पक्राउ गरेको छ ।
झण्डै १ महिनाअघि डेंगी भई सञ्चो अस्पतालमा आएका हेटौंडा–१२ पदमपोखरीका ४१ वर्षीय राजेश प्रधानको निधन भएपछि आफन्त आक्रोशित भएका थिए ।
