२८ साउन, काठमाडौं। प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रतिकुल मौसमका कारण चितवनबाट फर्किन ढिलाइ भएको छ ।
औपचारिक कार्यक्रम तय नगरि चितवनको भरतपुर पुगेका प्रचण्ड शनिबार भएको अन्तर्राष्ट्रिय युवा दिवसको कार्यक्रममा भने सहभागी भएका थिए ।
प्रधानमन्त्री आइतबार बिहान चितवनबाट फर्किने तय भएपनि खराब मौसमका कारण उडान डिले भएको प्रधानमन्त्रीका प्रेस सल्लाहकार गोविन्द आचार्यले जानकारी दिए ।
माओवादी केन्द्रबाट मन्त्री रहेका सुदन किराती र अमनलाल मोदीलाई फिर्ता बोलाएर जनमतकी अनितादेवी साह र माओवादी केन्द्रकै हितबहादुर तामाङलाई मन्त्री बनाउने तयारी रहेको बताइएको छ ।
प्रचण्ड पार्टीबाट मन्त्री रहेका किराती र मोदीको कार्यशैलीप्रति असन्तुष्ट रहेको बताईन्छ । पछिल्लो समय काम भन्दा गफ बढी गरेको भन्दै मोदी र किराती दुबैलाई फिर्ता बोलाउन पार्टीभित्र प्रचण्डलाई दबाब रहेको एक नेताले बताएका छन् ।
