२६ साउन, दाङ। दाङको घोराहीमा धारिलो हतियार प्रहार गरि फरार रहेका ६ जनालाई प्रहरीले १४ दिनपछि पक्राउ गरेको छ ।
घोराही उपमहानगरपालिका- १८ शंखेपिपल नजिक साउन १० गते तीर्थबहादुर पुनलाई खुकुरी प्रहार गरेको आरोपमा छजना पक्राउ परेका हुन्।
खुकुरी प्रहारबाट टाउको, अनुहार र बायाँ हातको कान्छी औँला बाहेक सबै औँला काटिएको अवस्थामा प्रहरीले तीर्थलाई उद्धार गरेर घोराहीस्थित राप्ती स्वास्थ्य विज्ञान प्रतिष्ठानमा उपचारका लागि लगेको थियो । प्रतिष्ठानमा उपचार सम्भव नभएपछि थप उपचारका लागि भोली पल्ट साउनको ११ गते मेडिकल कलेज भैरहवामा रिफर गरिएको थियो । अहिले पनि उनको भैरहवा मेडिकल कलेजमै उपचार भइरहेको प्रहरीले जानकारी दिएको छ ।
पक्राउ पर्नेमा घोराही- १८ का १७ वर्षीय किशोर, घोराही- १४ गणेश मन्दिर टोलका १६ वर्षीय किशोर, बंगलाचुली गाउँपालिका- १ जुम्लेपानी घर भइ घोराही- १८ बस्ने २० वर्षीय देवेन्द्र कँवर, घोराही- १८ का १७ वर्षीय किशोर, सैघा घर भइ घोराही- १८ बस्ने १७ वर्षीय किशोर र घोराही- १८ मसिनाका १५ वर्षीय किशोर गरी छ जनालाई पक्राउ गरेको प्रहरीले जनाएको छ।
उनीहरूलाई ज्यान मार्ने उद्योग सम्बन्धि कसुरमा जिल्ला अदालतबाट पाँच दिनको म्याद लिइ थप अनुसन्धान भइरहेको प्रहरी नायब उपरीक्षक गौतमले जानकारी दिए।
