४ जेठ, बर्दिया । राजापुर नगरपालिकाको मेयर र उपमेयरसहित प्रमुख कार्यकारी पदमा १० जना थारु निर्वाचित भएका छन् ।
स्थानीय तह निर्वाचनमा राजापुर नगरपालिकाको मेयरमा दिपेश थारु र उपमेयरमा मनकला थारु निर्वाचित भएका छन् । मनकला थारु यसअघि पनि उपमेयर थिइन् । त्यसैगरी, राजापुर नगरपालिकाको १० वटा वडा मध्ये आठ वटा वडाको अध्यक्षमा थारु उम्मेदवार निर्वाचित भएका छन् ।
उक्त नगरपालिकाको वडा नं. १ वडामा अध्यक्षका लागि बाबुराम थारु, वडा नं. २ को वडा अध्यक्षमा रामचन्द्र थारु र वडा नं. ३ को अध्यक्षमा प्रसाडु थारु निर्वाचित भएको निर्वाचन अधिकृतको कार्यालयले जनाएको छ ।
त्यसैगरी वडा नं. ५ को अध्यक्षमा रमेश दहित, वडा नं. ७ को वडा अध्यक्षमा राम थारु, ८ नं. वडा अध्यक्षमा राजेश थारु, ९ नं. वडामा विष्णुप्रसाद चौधरी र १० नं. वडा अध्यक्षमा शिवलाल थारु निर्वाचित भएका छन् । वडा नं. ४ को अध्यक्षमा विदुर पोख्रेल र वडा नं. ६ को अध्यक्षमा असराज न्यौपाने निर्वाचित भएका छन् ।
