५ वैशाख, काठमाडौं । एसीसी प्रिमियर कपको पहिलो खेलमा नेपालले मलेसियाविरुद्ध पहिले बलिङ गर्ने भएको छ ।
नेपाल र मलेसियाबीचको खेल कीर्तिपुरस्थित त्रिवि मैदानमा सुरु भएको छ । नेपालले मलेसियाविरुद्ध ज्ञानेन्द्र मल्ल, करण केसी र प्रतिश जिसीलाई प्लेइङ–११ मा समावेश गरेको छैन । सन्तोषजनक प्रदर्शन गर्न नसकेपछि पछिल्लो समय ज्ञानेन्द्र लगातार प्लेइङ–११ बाहिर छन् ।
नेपालले एसीसी प्रिमियर कपको उपाधि जितेमा ऐतिहासिक रुपमा एसिया कपमा छनोट भएर भारत पाकिस्तानसँग खेल्ने अवसर पाउनेछ । त्यसैले पनि नेपाली टोली र क्रिकेट समर्थक अहिले उत्साहित छन् । मलेसिया नेपालको लागि नयाँ प्रतिद्वन्द्वी होइन । ५० ओभरको खेलमा २०१२ यता खेलिएका पाँच खेलमा नेपाल मलेसियामाथि हाबी छ ।
