१४ माघ, नेपालगञ्ज । नेपालगञ्जमा आइतबारदेखि सुरु हुने वेष्टर्न ट्राभल मार्टको सबै तयारी पूरा भएको छ ।
आयोजक नाट्टा बाँके च्याप्टरले शनिबार नेपालगञ्जमा पत्रकार सम्मेलन गरेर वेष्टर्न ट्राभल मार्टको तयारी पूरा भएको जनाएको हो । यसपटकको मार्टमा मानसरोवर ‘माउन्टेन फ्लाइट’ आकर्षणको केन्द्रबिन्दुमा छ ।
६६ जना भारतीय टूर अपरेटरसहित सोमबार बिहान साढे ७ बजे मानसरोवर माउन्टेन फ्लाइट हुने आायोजक नाट्टा बाँके च्याप्टरका अध्यक्ष श्रीराम सिग्देलले शनिबार आयोजित पत्रकार सम्मेलनमा बताए । ‘नेपाल पर्यटन बोर्डको सहयोग र सहकार्यमा पहिलोपटक ६६ जनाभन्दा धेरै भारतीय टूर अपरेटर नेपालगञ्ज ल्याउनु पश्चिम नेपालको पर्यटन व्यवसायमा ठूलो उपलब्धी हो’ उनले पत्रकार सम्मेलनमा भने, ‘ उनका अनुसार पहिलोपटक ठूलो संख्यामा भारतीय टूर अपरेटर र भारतीय पत्रकार नेपाल आउन लागेका हुन् ।
सो टोलीमा ट्राभल एजेन्ट्स एशोसिएसन अफ इण्डिया (टाई) का पदाधिकारी र सदस्य पनि छन् । उनीहरुको विशेष बैठक नेपालगञ्ज वा बर्दियाको ठाकुराद्धारमा हुने सम्भावना पनि छ । नेपालगञ्जमा रहेको सिद्धार्थ होटलमा हुने कार्यक्रम आइतबारदेखि मंगलबारसम्म चल्नेछ ।
कार्यक्रमका लागि भारतीय टूर अपरेटर, भारतीय पत्रकार, नेपाल पर्यटन बोर्डका अधिकृत, नाट्टा, टान, हान, रेवान, नारा लगायत पर्यटन व्यवसायी संघ संस्थाका प्रमुख तथा पदाधिकारीका साथै सोलो ट्राभलर कञ्चन राई ‘घुमन्ते’ र सिर्जना सिज्जु पनि आउनेछन् ।
