३ भदौ, काठमाडौं । नेकपा माओवादी केन्द्र अध्यक्ष पुष्पकमल दाहाल प्रचण्डले पार्टीको भ्रातृ संगठन वाईसीएललाई फौजको रुपमा प्रस्तुत हुन निर्देशन दिएका छन् ।
प्रचण्डले देशको विकास र सुशासनको लागि मुलुकले फेरि एकपटक माओवादीको नेतृत्व खोजेको बताएका छन् । परिवर्तनको बाहकलाई पन्छाएर परिवर्तन विरोधीबाट विकास र सुशासन सम्भव नभएको उनको भनाइ छ ।
पार्टीनिकट योङ कम्युनिस्ट लिग (वाईसीएल)को भेलालाई शुक्रवार काठमाडौंमा सम्बोधन गर्दै प्रचण्डले राज्यलाई ठीक ढंगले नेतृत्व गरेमात्र जनताले चाहेको विकास र समृद्धिको चाहना पूरा हुने बताएका हुन् ।
‘हिजो हामी जनयुद्धमा हुँदा लडाईंको अग्रमोर्चामा को जाने भनेर प्रतिस्पर्धा हुन्थ्यो,’ प्रचण्डले भने, ‘कोही जान नपाएको खण्डमा हामी मर्न पनि जान नपाउने भने असन्तुष्टि हुन्थ्यो।’ तर, अहिले पद र सुविधाको लागि मात्र प्रतिस्पर्धा भएको प्रचण्डले बताए। ‘अहिले पद र सुविधाको निम्ति मात्र प्रतिस्पर्धा हुन्छ, संघर्षको निम्ति प्रतिस्पर्धा हुँदैन। आज भोलिको अनुभव अलिकति नमिठो बन्दै गएको छ।’
पार्टीभित्र देखिएको यस्तो विचलनको संकेत लाई चिर्न युवाहरुको भूमिका महत्वपूर्ण हुने प्रचण्डले बताए।
