५ चैत, काठमाडौं: कलाकार प्रकाश सपुतले ‘पीर’ म्यूजिक भिडियोको विवादास्पद दृश्य हटाएर भिडियो पुनः यूटयुबमा अपलोड गरेका छन् ।
एक सातामै करोड बढी भ्युज पुगेको पुरानो भिडियोलाई भने उनले युट्युबबाट हटाएका छन्। शनिबार पौने ६ बजे साँझतिर पुनः अपलोड गरिएको गीतबाट माओवादीकी पूर्व लडाकुले देहव्यापार गर्न बाध्य भएको दृश्य हटाइएको छ ।
माओवादीबाट आपत्ति व्यक्त भएको मुख्य दृश्य हटाएर गीतका अरू दृश्य तथा शब्द भने यथावत राखेर पुनः अपलोड गरिएको हो । भिडियोबाट यौनकर्मीको दृश्य हटाएका हुन् ।
गत साता सार्वजनिक भएको यो गीत निकै चर्चामा रहेको छ । नयाँ भिडियो राखेपछि उनले भनेका छन्, ‘भयो अब, पुग्यो !’ उनले नयाँ भिडियोमा ‘दृश्य सम्पादनपछि’ भनी उल्लेख गरेका छन् ।
