चुनावबारे छलफल गर्नका लागि भन्दै प्रधानमन्त्रीले बोलाएको सर्वदलीय बैठकमा एमाले नजाने एमाले उपमहासचिव प्रदीप ज्ञवालीले जानकारी दिए । स्थानीय निर्वाचन नगर्ने नियतका साथ सर्वदलीय बोलाएका कारण आफूहरु सहभागी नहुने ज्ञवालीको भनाइ छ ।
‘सरकारको समयमै निर्वाचन नगर्ने नियत देखियो’, ज्ञवालीले भने, ‘यो अवस्थामा सर्वदलीय बैठकमा हामी जानुको औचित्य छैन ।
बैठक बिहान साढे ९ बजे प्रधानमन्त्री निवास बालुवाटारमा बस्नेछ । बैठकमा स्थानीय तहकाे निर्वाचन, संसद खुलाउने लगायतका विविध विषयमा छलफल गरिने प्रधानमन्त्रीका प्रेस संयोजक गोविन्द परियारले जानकारी दिए ।
सर्वदलीय बैठक बोलाउनुअघि प्रधानमन्त्री एवं कांग्रेस सभापति देउवाले हिजो साँझ विभिन्न दलका नेताहरुसँग छलफल गरेका थिए । त्यसअघि हिजो बसेको सत्तारुढ दलको उच्चस्तरीय राजनीतिक समन्वय समितिको बैठकले संविधान र कानूनीविद्हरुसँग परामर्श गर्ने र स्थानीय तहको निर्वाचनको मिति तोक्ने सहमति गरेको थियो ।
