७ माघ, काठमाडौं। नेकपा (एमाले) को विभिन्न जिम्मेवारीमा रहेका ५९ जना नेता तथा कार्यकर्ताले पार्टी परित्याग गरी भीम रावललाई साथ दिने घोषणा गरेका छन् ।
सोमबार विज्ञप्ती जारी गरेर एमालेका विभिन्न विभाग र कमिटीमा रहेका ५९ जनाले एमाले परित्याग गरेको घोषणा गरेका हुन्। एमाले त्यागेर रावलको अभियानलाई साथ दिनेहरूमा नेकपा (एमाले) सुदूरपश्चिम प्रदेश कमिटी सदस्य चक्र रावल, जंग विक, केशर मियाँ, निर्मला रावल, दूधकला विष्ट, केन्द्रीय पर्यटन विभाग सदस्य रमेशबहादुर कुँवर, प्रदेश कमिटी आथिक विभाग सदस्य दीपक सुनार, सुदूरपश्चिम प्रदेश सल्लाहकारहरू हर्क कुँवर, सुशीला बोगटी र सुरथ भुललगायत छन् ।
उनीहरूले भीम रावललाई पार्टीको संगठित सदस्यता खोस्नुलाई अध्यक्ष केपी शर्मा ओलीको स्वेच्दछाचारी र निरंकुश निर्णय भनेका छन्।
नेकपा (एमाले) को यही पुस १० गते बसेको सचिवालय बैठकले पार्टी अनुशासनविपरीत कार्य गरेको भन्दै पूर्वउपप्रधान तथा गृहमन्त्रीसमेत रहेका रावललाई पाटीको साधारण सदस्यसमेत नरहने गरी कारबाही गरेको थियो । एमालेले कारबाही गरेसँगै रावलले मातृभूमि अभियान घोषणा गरेर एमालेभित्रका र अन्य दलका असन्तुष्ट पक्षलाई समेट्ने प्रयास गरिरहेका छन् ।
