२० पुस, काठमाडौं। स्पेनिस ला लिगामा रियल मड्रिडले भ्यालेन्सियामाथि पुनरागमन जित निकालेको छ ।
गएराति भएको खेलमा रियल मड्रिडले घरेलु टोली भ्यालेन्सियामाथि २-१ गोलअन्तरको पुनरागमन जित निकालेको हो । खेलमा सुरुवाती अग्रता भने भ्यालेन्सियाले लिएको थियो ।
इंग्लिस मिडफिल्डर जुड बेलिङघमले ९५ औं मिनेटमा निर्णायक गोल गरे । त्यस अगाडि उनी पेनाल्टी चुकेका थिए । भ्यालेन्सियाले २७ औं मिनेटमा ह्युगो डुरोको गोलले अग्रता लिएको थियो । भ्यालेन्सियाले गत साता मात्रै आफ्नो नयाँ प्रशिक्षकमा कार्लोस कोरबेरनलाई नियुक्त गरेको थियो ।
तर लुका मोडरिचले ८५ औं मिनेटमा गोल गरेपछि रियल खेलमा फर्केको हो । यो जितपछि रियलको १९ खेलबाट ४३ अंक भएको छ । छिमेकी एटलेटिको म्याड्रिडको ४१ अंक छ । उसले एक खेल कम खेलेको छ । बार्सिलोना ३८ अंकमा तेस्रो स्थानमा छ ।
