२० साउन, काठमाडौँ। काठमाडौंको कालोपुलमा २० वर्षीय प्रेम महत दर्जी मृत फेला परेका छन्।
उनको हत्या भएको आशंकामा जिल्ला प्रहरी परिसर, काठमाडौंले मृतककी श्रीमती २४ वर्षीया उषा नेपाली र अर्का युवक २७ वर्षीय मदन रम्तेललाई पक्राउ गरेको परिसरका एसपी नवराज अधिकारले बताए।
यी दम्पती एक महीनादेखि कालोपुलमा भाडामा बस्दै आएका थिए। मृतक प्रेमको घर ओखलढुंगाको लिखु गाउँपालिका-९ मा रहेको प्रहरीले जनाएको छ। हत्या अभियोगमा पक्राउ परेकी उषाको माइती भने मानेभन्ज्याङ गाउँपालिकामा पर्छ।
‘आज (आइतबार) कालोपुलस्थित डेराको घरमा प्रेम मृत अवस्थामा फेला परेकाले मृतककी श्रीमती उषा र मदन रम्तेललाई पक्राउ गरिएको हो,’ उनले भने। घटनाबारे थप अनुसन्धान भइरहेको प्रवक्ता अधिकारीले बताए।
