२१ फागुन, काठमाडौँ। नेकपा (एकीकृत समाजवादी) नयाँ गठबन्धनमा सामेल हुने कि नहुने अन्योलमा देखिएको छ।
महासचिव घनश्याम भुसालका अनुसार नेकपा एसले आज अपरान्ह ३ बजे सचिवालय बैठक बोलाएको हो । नेकपा एस नयाँ गठबन्धनमा सामेल हुने कि नहुने अन्योलमा देखिएको छ । प्रधानमन्त्री दाहाल नेकपा माओवादी, नेकपा (एमाले), रास्वपा र जसपासहित नयाँ गठबन्धनबाट आज सानो आकारको मन्त्रिपरिषद् गठन गर्ने तयारीमा छन् ।
‘हामीले नयाँ राजनीतिक घटनाक्रमलाई सतर्कतापूर्वक हेरिरहेका छौं, यो गठबन्धन कसरी बन्छ, कुन-कुन पार्टी सहभागी हुन्छन् र यसको नीति के हुन्छ भन्ने आधारमा हामी निर्णय गर्छौं,’ भूसालले भने, ‘हाम्रो राजनीति, नेताहरू र राजनीतिक उतारचढावका आधारमा यो अन्तिम गठबन्धनचाहिँ होइन।’ अध्यक्ष माधवकुमार नेपाललाई बिसञ्चो भएकोले सचिवालय बैठक कोटेश्वरस्थित उनकै निवासमा बस्नेछ।
गए राति बालुवाटारमा भएको छलफलमा प्रधानमन्त्री पुष्पकमल दाहाल प्रचण्ड र नेकपा (एमाले) का अध्यक्ष केपी शर्मा ओलीबीच छलफल हुँदा एकीकृत समाजवादीबारे पनि कुराकानी भएको थियो।
