काठमाडौं । राष्ट्रियसभा सदस्यहरूले सवारी दुर्घटनालाई न्यूनीकरण गर्नुपर्ने भन्दै जरुरी सार्वजनिक महत्त्वको प्रस्ताव दर्ता गराएका छन् ।

सोमबार दर्ता गरिएको जरुरी सार्वजनिक महत्त्वको प्रस्तावमा राष्ट्रियसभा सदस्यहरूले नेपालको संविधानमै मौलिक हकमा सम्मानपूर्वक बाँच्न पाउने र आधारभूत स्वास्थ्यको हक सुनिश्चित गरिएको उल्लेख गरेका छन् ।

उनीहरूले प्रस्तावमा सवारी दुर्घटनालाई न्यूनीकरण गर्ने र दुर्घटनामा परी ज्यान गुमाउनेको परिवारलाई उचित क्षतिपूर्ति, घाइतेको उद्धार तथा उपचार, अपांगता भएका नागरिकलाई उचित प्रबन्ध तथा मर्यादित श्रमको प्रवर्धनको विषय समावेश गरेका छन् ।

प्रस्तावमा चालक एवं सहचालकका लागि परामर्श केन्द्र र गुनासो सुनुवाइ गर्ने निकायको व्यवस्था गर्नुपर्ने उल्लेख छ । आमनागरिकबीच सडकको सही प्रयोगकाबारे चेतना अभिवृद्धि अभियानलगायत विषयमा तत्काल कदम चाल्न आवश्यक देखिएकाले जरुरी सार्वजनिक महत्त्वको प्रस्ताव पेस गरिएको उनीहरूको भनाइ छ ।