२५ पुस,विराटनगर । कोसी प्रदेशको सभामुखमा राष्ट्रिय प्रजातन्त्र पार्टी (राप्रपा)का अम्बरबहादुर विष्ट निर्वाचित भएका छन् ।
कोसी प्रदेशसभाको आज बसेको बैठकले विष्टलाई सर्वसम्मत रूपमा सभामुख चयन गरेको हो । त्यस सम्बन्धमा सभाले आजै निर्वाचन कार्यतालिका प्रकाशन गरेको थियो ।
प्रदेशसभामा सर्वसम्मत भएका विष्टको सभामुखमा दिएको उम्मेदवारीलाई लिएर राप्रपाभित्र किचलो उत्पन्न भएको हाे। उनको उम्मेदवारी पार्टी निर्णय विपरित भएको भन्दै राप्रपाका कतिपय नेताहरुले असन्तुष्टि जनाइरहेका छन्।
यस अघि पटक-पटक कोशीमा सत्ता राजनीतिका अस्वभाविक क्रियाकलापमा सहभागी नहुने घोषणा गरेको राप्रपाले सभामुखमा उम्मेदवारी दिएपछि केन्द्रका नेताहरुले असन्तुष्टि जनाएका थिए। मंगलबार सभामुखको निर्वाचनमा सत्तागठबन्धन र एमालेले उम्मेदवारी नदिएपछि राप्रपाका विष्ट निर्विरोध भएका हुन्।
विष्टलाई सभामुख बनाउन राप्रपा कोसी प्रदेश संसदीय दलका नेता भक्तिप्रसाद सिटौलाले प्रदेशसभा बैठकमा प्रस्ताव पेस गरेका थिए । उनको प्रस्तावलाई राप्रपा सांसद प्रेमराज थाम्सुहाङले समर्थन गरेका थिए । उनको प्रस्ताव दलहरूले सर्वसम्मतिले पारित गरेको हो ।
सभाले प्रकाशन गरेको निर्वाचन कार्यतालिका अनुसार सभामुखमा विष्टको मात्र मनोनयन परेको थियो ।
