२० मंसिर,मोरङ। विराटनगरको सातघुम्तीमा रहेको एक कबाडी गोदाममा बुधबार दिउँसो आगलागीमा घाइते भएका चार जनालाई नेपाली सेनाको स्काइ ट्रक’ मार्फत थप उपचारका लागि काठमाडौं कीर्तिपुर वर्न सेन्टर लगिएको छ ।
विराटनगरको सातघुम्तीमा रहेको कवाडी गोदाममा भएको आगलागीका घाइतेमध्ये एक जनाको अस्पतालमा र अर्का एकको घटनास्थलमै मृत्यु भएको थियो। घाइतेमध्ये २ जनाको अवस्था गम्भीर भएको प्रहरीले जनाएको छ।
मोरङ प्रहरी प्रहरी प्रमुख दिपक पोखरेलका अनुसार विराटनगर महानगरपालिका- ७ की ५५ वर्षीया रिता सरदार, वडा ६ की ६० वर्षीया सुशीला पासवान,५८ वर्षीय किशोर पासवान र ३० वर्षीया पिंकी कामत घाइते छन् । उनीहरू चार जनालाई नै थप उपचारका लागि काठमाडौं लगिएको उनले बताए । घाइतेमध्ये रिता र सुशीलाको अवस्था गम्भीर छ ।
कबाडीका कामदारहरुले संकलित वस्तु किच्याउने क्रममा आगलागी भएको घाइतेमध्येका किशोर पासवानले बतााए । पासवानका अनुसार अल्मुनियमको सेन्टको बोतल फुटेपछि आगो सल्किएको हो । उनले आफू भागेको तर पछि त्यही काम गरिरहेकी श्रीमती सुशीलालाई बचाउन जाँदा आगोले जलेको बताए ।
कवाडी गोदाममा दिउँसो २ः१५ बजेतिर एक्कासि आगलागी भएको थियो। गोदामभित्र काम गरिरहेको अवस्थामा बाहिर निस्कने गेटबाट आगो लागेका कारण कामदारहरू सहजै भाग्न नपाएको प्रहरीको भनाइ छ।
