१९ मंसिर,काठमाडौं। एनसेलले सेयरधनी परिवर्तन भएपनि सेवामा कुनै अवरोध नहुने बताएको छ। एनसेलले एक सूचना जारी गर्दै सेयरधनी परिवर्तन भएपनि हाल प्रदान गरिँदै आएका सेवा र सुविधामा कुनै अवरोध नपर्ने उल्लेख गरेको हो।
मङ्गलवार एक सूचना प्रकाशित गर्दै कम्पनीले आफ्नो सिद्धान्त ‘हामी तपाईंको लागि’ अनुसार विगतका दिनमा झैं उही उत्साह र समर्पणका साथ गुणस्तरीय दूरसञ्चार सेवा प्रदान गर्ने प्रतिबद्धता व्यक्त गरेको छ ।
“हाम्रा आदरणीय ग्राहकवर्ग तथा साझेदार लगायत समग्र एक करोड ६० लाख एनसेल परिवारलाई हार्दिक कृतज्ञता व्यक्त गर्दै भविष्यमा नेपाल र नेपालीको विकास तथा समृद्धिका लागि सदा समर्पित रहने वाचा गर्दछौं,” सूचनामा भनिएको छ ।
मङ्सिर १३ गते एनसेलको ८० प्रतिशत शेयर भएको मलेसियन कम्पनी आजियाटा ग्रुपले एनसेल बिक्रीमा राख्ने निर्णय भएको जानकारी दिएको थियो । त्यसको दुई दिनपछि मङ्सिर १५ गते आजियाटाले साढे छ अर्ब रुपैयाँमा बेलायती कम्पनी स्पेक्ट्रलाइटलाई ८० प्रतिशत शेयर बिक्री गरेको घोषणा गरेको थियो ।
मंगलबार एनसेलले दूरसञ्चार प्राधिकरणलाई सेयर खरिद बिक्रीको जानकारी गराएको छ।
