१६ कात्तिक, काठमाडौं । टी–२० विश्वकप क्वालिफायरको समूह चरणको अन्तिम खेलमा नेपाललाई ओमानले जितका लागि १४६ रनको लक्ष्य दिएको छ ।
टस हारेर ब्याटिङको निम्तो पाएको ओमानले निर्धारित २० ओभरमा ९ विकेट गुमाउँदै १४५ रन बनाएसँगै नेपालले १४६ रनको मध्यम लक्ष्य पाएको हो ।
समूहगत चरणको अन्तिम खेलअघि नै नेपाल र ओमान समूह ‘ए’ बाट सेमिफाइनलमा भने पुगिसकेका छन् । आज हुने खेलले समूह बितेको टुङ्गो लगाउने छ ।
जारी प्रतियोगितामा नेपालले सिंगापुरलाई ८ र मलेसियालाई ६ विकेटले हराएको थियो भने ओमानले मलेसियालाई ३२ र सिंगापुरलाई २२ रनले पराजित गरेको थियो ।
ओमानविरुद्ध नेपालका लागि करण केसीले ३, सन्दीप लामिछाने, सोमपाल कामीले समान २ तथा गुलशन झा र अविनाश बोहराले १–१ विकेट लिए । सन्दीपले ४ ओभरमा ३० रन दिएर २ विकेट लिए ।
सोमपालले किफायती बलिङ गर्दै ४ ओभरमा १६ रन दिएर २ विकेट हात पारे । करणले ४ ओभरमा ४३ रन दिएर ३ विकेट लिए ।
