उक्त मण्डपको हालसम्म करिव ७५ प्रतिशत वित्तीय र ८० प्रतिशत भौतिक प्रगति भइरहेको उक्त कार्यालयका सूचना अधिकृत इञ्जिनीयर लक्ष्मण यादवले बताए । हालसम्म रु १३ करोड ३५ लाख ३६ हजार छ सय खर्च भइसकेको मण्डप आसपास पौराणिकपन झल्किने गरी राजा जनकको दुई तले दरबार, २५ वटा विश्राम कक्ष, दुई वटा डायनिङ कक्ष, बरबधुको विश्रामका लागि एक धर्मशाला, एकवटा स्वयम्बर मण्डपसहित दुई वटा मण्डप र २१ वटा शैचालयलगायत संरचना निर्माण गरिने इञ्जिनीयर यादवले बताए ।

यस विवाह मण्डपलाई पर्यटनको केन्द्र बनाउन र जनकपुरधामलाई पवित्र र धार्मिक वैवाहिक गन्तव्यका रुपमा विकास गराउन लागिएको वडा नं १३ का वडाध्यक्ष जतबहादुर राउतले बताए ।

विभागबाट खटेका विशेषज्ञले डिजाइन गरेको सो विवाह मण्डपमा गुठी संस्थानले भौतिक संरचना निर्माणका लागि साँढे चार बिघा जग्गा उपलब्ध गराएको थियो ।‘डबल हाइट पब्लिक कोर्ट रूम’ पनि बन्दैछ जसमा ३० जना अटाउने छन् । मण्डप छेउमा प्रसाद र शृङ्गारका सामान बेच्न व्यापारिक भवन पनि बनाइएको छ ।

जानकी मन्दिरकै शैलीमा यी भवनको डोम र गुर्जा बनाउने सम्झौता रहेको र त्यसअनुसार काम गर्न भारतको राजस्थानबाट बुट्टा बनाउने मिस्त्री ल्याउनु परेको, कोरोना सङ्क्रमणका बेला छ वटा गुर्जा बनाउन नौ महिना लागेकामा हाल धमाधम काम भइरहेको इञ्जिनीयर यादवले बताए ।

प्लास्टर, पुटिङ, बुट्टा, फिनिसिङलगायत काम हुँदैछ । मार्बल लगाइँदै छ । फर्निचर, विद्युत् र पेन्टिङको काम भने बाँकी छ । अहिले सुविधा सम्पन्न र आकर्षक यी संरचना देखेर यहाँका बासिन्दा दङ्ग छन् । आयोजना सम्पन्न हुनै लाग्दा अव देश विदेशबाट तीर्थालु आउने र व्यापार–व्यवसाय बढ्ने भएपछि बल्ल विकासको आशा पलाएको स्थानीयवासी विनोद साहले बताए । जनकपुरधामको मुख्य बजारदेखि करिब तीन किलोमिटरको टाढा  रहेको यो स्थानलाई राज्य र जनकपुरधामकै बजार क्षेत्रका साधुसन्तले अहिलेसम्म ओझेलमा पार्ने काम गरेको विवाह मणिमण्डप विकास समितिका अध्यक्ष नरायण राउतले गुनासो गरे

विवाह मण्डप निर्माण भएपछि  नेपाल र भारतका साथै अन्य मुलुकबाट पनि दर्शनको लागि यात्रु आउने उनको भनाइ थियोे ।